"போலி ஜிபே... போலி வக்கீல்" - கோவையில் டிபார்ட்மெண்டல் ஸ்டோரில் ஏமாற்றிய பெண் : மடக்கிப் பிடித்து போலீசில் ஒப்படைத்த ஊழியர்கள்!

₹200-க்கு ஆசைப்பட்டு ₹2,500-க்கு ஸ்கெட்ச் போட்ட போலி வழக்கறிஞர் : வண்டியில் வழக்கறிஞர் ஸ்டிக்கருடன் சுற்றித் திரிந்த கூத்து!

​ கோவையில் உள்ள டிபார்ட்மென்டல் ஸ்டோரில் மளிகைப் பொருட்களை வாங்கிக் கொண்டு, கூகுள் பே (GPay) முறையில் பணம் அனுப்பிவிட்டதாகக் கூறி ஏமாற்றித் தப்ப முயன்ற போலி பெண் வழக்கறிஞரை ஊழியர்கள் சாதுரியமாகப் பிடித்து ரத்தினபுரி காவல் நிலையத்தில் ஒப்படைத்தனர்.

​நேற்று ₹200... இன்று ₹2,500!

கோவை, சிவானந்தா காலனி பகுதியைச் சேர்ந்த வாசகி என்ற பெண், பவர்ஹவுஸ் பகுதியில் இயங்கி வரும் ஒரு டிபார்ட்மென்டல் ஸ்டோருக்கு நேற்று மாலை சென்று உள்ளார். அங்கு ரூ. 200 மதிப்பிலான மளிகைப் பொருட்களை வாங்கிய அவர், பணத்தை ஆன்லைன் மூலம் 'ஜிபே' செய்து விட்டதாகப் பொய் கூறி விட்டு அங்கு இருந்து நைஸாக நழுவி உள்ளார்.

​இந்நிலையில், இன்று இரவு சுமார் 7 மணி அளவில் அதே பெண் மீண்டும் அதே கடைக் சென்று உள்ளார். இந்த முறை தாராளமாகச் சுமார் ரூ. 2,500 மதிப்பிலான பொருட்களை அள்ளிக் கொண்டு, வழக்கம் போல் "ஜிபே பண்ணிட்டேன்" என்று கூறி விட்டு அங்கு இருந்து புறப்பட முயன்று உள்ளார்.

கடையின் கல்லாப் பெட்டியில் இருந்த ஊழியர்கள் ஜிபே கணக்கைச் சரி பார்த்த போது, பணம் வந்து சேராததை கண்டு அதிர்ச்சி அடைந்தனர். உடனடியாக சுதாரித்துக் கொண்ட ஊழியர்கள், அந்தப் பெண் நடந்து சென்ற பாதையில் வேகமாகப் பின்தொடர்ந்து ஓடினர்.

​அருகில் உள்ள பழமுதிர் நிலையம் அருகே வைத்து அந்தப் பெண்ணை ஊழியர்கள் சுற்றி வளைத்துச் மடக்கிப் பிடித்தனர்.

 இதுகுறித்து உடனடியாக ரத்தினபுரி காவல் நிலையத்திற்குத் தகவல் தெரிவிக்கப்பட்டது.

சம்பவ இடத்திற்கு விரைந்து வந்த ரத்தினபுரி காவல்துறையினர், அந்தப் பெண்ணைப் பிடித்துக் காவல் நிலையம் அழைத்துச் சென்று தீவிர விசாரணை நடத்தினர்.

​விசாரணையின் போது, தான் ஆந்திராவில் உள்ள 'குளோபல் சட்டக் கல்லூரியில்' (Global Law College) பயிலும் வழக்கறிஞர் எனக் கூறி அந்தப் பெண் கெத்து காட்ட முயன்று உள்ளார். மேலும், அவர் ஓட்டி வந்த இருசக்கர வாகனத்தின் முன்பகுதியிலும் பெரிய எழுத்துக்களில் 'ADVOCATE' (வழக்கறிஞர்) என்ற ஸ்டிக்கர் ஒட்டப்பட்டு இருந்தது.

​ஆனால், காவல் துறையினர் நடத்திய முதற்கட்ட விசாரணையில், அவர் சட்டப்படிப்பு எதுவுமே படிக்கவில்லை என்றும், வழக்கறிஞர் என்று பொய்ய சொல்லி ஊரை ஏமாற்றி வந்ததும் அம்பலமானது.

​நேற்று ரூ. 200-க்கு ஏமாற்றியவர், இன்று தைரியமாக ரூ. 2,500-க்கு ஆப்பு வைக்க முயன்ற போது கையும் களவுமாக, மாட்டி உள்ளார். 

இந்தச் சம்பவம் குறித்து ரத்தினபுரி போலீசார் அந்தப் பெண் வேறு எங்காவது இதுபோன்று 'ஜிபே' மோசடிகளில் ஈடுபட்டுள்ளாரா ? என்ற கோணத்தில் தொடர்ந்து தீவிர விசாரணை நடத்தி வருகின்றனர்.

Continue Reading

தீபாவளி வசூல்; கடைக்கு ரூபாய் 10,000 வீதம் லஞ்சம் - கோவையில் அதிகாரி சிக்கினார்!

தீபாவளி பண்டிகை வருகிற 8-ந் தேதி கொண்டாடப்படுகிறது. இந்த பண்டிகையையொட்டி அரசு அலுவலகத்தில் பணியாற்றி வரும் ஊழியர்கள் பலர் லஞ்சம் வாங்குவதாக கோவை மாவட்ட லஞ்ச ஒழிப்புத்துறை போலீசாருக்கு ரகசிய தகவல் கிடைத்தது. அதன் அடிப்படையில் போலீசார் தீவிரமாக கண்காணித்து வருகின்றனர்.

இந்த நிலையில் லஞ்ச ஒழிப்புத்துறை போலீஸ் துணை சூப்பிரண்டு இமானுவேல் ஞானசேகரன் தலைமையில், கோவை புலியகுளத்தில் உள்ள மாநகராட்சி உணவு பாதுகாப்புத்துறை அலுவலகத்துக்கு சென்றனர். அங்கு உணவு பாதுகாப்புத்துறை அதிகாரியாக பணியாற்றி வரும் கோவையை சேர்ந்த ராமசாமி (வயது 45) என்பவர் அறைக்கு சென்று திடீரென்று அதிரடி சோதனை நடத்தினர்.

அப்போது அந்த அலுவலகத்தில் அவருடைய அறையில் இருக்கும் மேஜையில் 6 கவர்கள் இருந்தன. அதற்குள் ரூ.57 ஆயிரம் இருந்தது. உடனே போலீசார் அந்த பணத்துக்கு கணக்கு கேட்டனர். ஆனால் அந்த பணத்துக்கு எந்த கணக்கும் இல்லை. எனவே அது கணக்கில் வராத பணம் என்பதும், பொதுமக்களிடம் இருந்து தவறான முறையில் பெறப்பட்டது என்பதும் தெரியவந்தது.

இதை அடுத்து போலீசார் ராமசாமியிடம் இருந்து கணக்கில் வராத ரூ.57 ஆயிரத்தை பறிமுதல் செய்தனர். தொடர்ந்து ராமசாமியிடம் போலீசார் தீவிரமாக விசாரணை நடத்தி வருகின்றனர்.

Continue Reading

ரூ. 3 கோடி மதிப்பிலான தங்கம் பறிமுதல்" - கோவை டவுன்ஹால் நகைக் கடைகளில் பி.ஐ.எஸ் (BIS) அதிகாரிகள் அதிரடி சோதனை!

6 இலக்க HUID ஹால்மார்க் முத்திரை இன்றி தங்கம் விற்பனை: பிக் பஜார் தெருவில் 4 கடைகளில் பாய்ந்த நடவடிக்கை!

 கோவையின் முக்கிய வணிகப் பகுதியான டவுன்ஹால் பகுதியில் உள்ள 4 பிரபல நகைக் கடைகளில் இந்திய தர நிர்ணய அமைப்பின் (Bureau of Indian Standards - BIS) அதிகாரிகள் நடத்திய அதிரடி சோதனையில், HUID ஹால்மார்க் முத்திரையின்றி விற்பனைக்கு வைக்கப்பட்டு இருந்த ரூ. 3 கோடி மதிப்பிலான 2.085 கிலோ தங்க நகைகள் பறிமுதல் செய்யப்பட்டன.

கோவை, ரேஸ்கோர்ஸில் இயங்கி வரும் பி.ஐ.எஸ் கிளை அலுவலக அதிகாரிகள், இன்று (04.11.2026) டவுன்ஹால் பிக் பஜார் தெரு மற்றும் அதன் சுற்றி உள்ள நகைக் கடைகளில் திடீர் தணிக்கை மேற்கொண்டனர்.

அப்போது, அரசு விதிகளுக்குப் புறம்பாக HUID (Hallmark Unique Identification) எண் இல்லாத தங்க நகைகளை விற்பனைக்கு வைத்து இருந்தது கண்டுபிடிக்கப்பட்டது.

பெரிய கடை வீதியில் உள்ள KRT JEWELLERS  

ANUBHAV JEWELLERS, SREE VASAVI CHAINS, பவளம் தெரு (ராஜா ஹால் அருகில்) KK CHAINS & JEWELS ஆகிய நகைக் கடைகளில்

மத்திய அரசு உத்தரவின்படி, கடந்த 31 மார்ச் 2023-க்குப் பிறகு 6 இலக்க HUID ஹால்மார்க் தனித்துவ எண் இல்லாத எந்தவொரு தங்க நகையையும் விற்பனை செய்யக் கூடாது என்பது கட்டாயமாக்கப்பட்டு உள்ளது. ஆனால், இந்த விதிமுறையை மீறி விற்பனைக்கு வைக்கப்பட்டு இருந்த 2.085 கிலோ எடை உள்ள தங்க நகைகளை அதிகாரிகள் பறிமுதல் செய்தனர். இதன் சர்வதேச/சந்தை மதிப்பு சுமார் ரூ. 3 கோடி இருக்கும் எனத் தெரிவிக்கப்பட்டு உள்ளது.

பி.ஐ.எஸ் சட்டம் 2016-ன் படி, HUID இன்றி நகைகளை விற்பனை செய்வது தண்டனைக்குரிய குற்றமாகும். இக்குற்றத்தில் ஈடுபடுவோருக்கு,

1 ஆண்டு வரை சிறை தண்டனை, அல்லது ரூ. 1 லட்சம் வரை அபராதம், பறிமுதல் செய்யப்பட்ட பொருட்களின் மதிப்பில் 5 மடங்கு வரை அபராதம் விதிக்கப்பட வாய்ப்பு உள்ளது.

பொதுமக்கள் தாங்கள் வாங்கும் தங்க நகைகளில் 6 இலக்க HUID எண் மற்றும் BIS முத்திரை உள்ளதா ? என்பதை உறுதி செய்ய வேண்டும். டவுன்ஹால் பகுதிகளில் சமீபத்தில் நகை வாங்கியவர்கள், தங்களின் பில்லில் HUID எண் குறிப்பிடப்பட்டு உள்ளதா ? என்பதைச் சரிபார்த்துக் கொள்ள அறிவுறுத்தப்படுகிறார்கள்.

HUID முத்திரை இன்றி நகைகள் விற்பனை செய்யப்படுவது தெரியவந்தால, கோவை ரேஸ்கோர்ஸில் உள்ள BIS அலுவலகத்தில் புகார் அளிக்கலாம். BIS Care App மூலம் புகாரைப் பதிவு செய்யலாம். hcbo@bis.gov.in என்ற முகவரிக்கு மின்னஞ்சல் அனுப்பலாம்.

புகார் தெரிவிப்பவர்களின் விவரங்கள் முற்றிலும் ரகசியமாகப் பாதுகாக்கப்படும் என அதிகாரிகள் உறுதியளித்து உள்ளனர்.

Continue Reading

"தென்னை மர ஊட்டச்சத்து குறைபாட்டை தடுப்பது எப்படி ?" - குறுநல்லிபாளையத்தில் அமிர்தா வேளாண் கல்லூரி மாணவர்கள் விழிப்புணர்வு!

கிராமப்புற வேளாண் பணி திட்டத்தின் (RAWE) கீழ் நேரடி செயல்முறை விளக்கம்: திரளாகப் பங்கேற்ற உள்ளூர் விவசாயிகள்!

கோவை மாவட்டம், குறுநல்லிபாளையம் ஊராட்சியில், தென்னை மரங்களில் ஏற்படும் ஊட்டச்சத்துக் குறைபாடுகள் மற்றும் நோய்ப் பாதிப்புகளைக் கண்டறிந்து மகசூல் இழப்பைத் தடுப்பது குறித்து அமிர்தா வேளாண் அறிவியல் கல்லூரி மாணவர்கள் சிறப்பு விழிப்புணர்வு நிகழ்ச்சியைச் சமீபத்தில் (நவம்பர் 1) நடத்தினர்.

அமிர்தா வேளாண் அறிவியல் கல்லூரி முதல்வர் டாக்டர் சுதீஷ் மணலில் நேரடி வழிகாட்டுதலின்படி, கிராமப்புற வேளாண் பணி அனுபவத் திட்டத்தின் (RAWE - Rural Agricultural Work Experience) கீழ் இந்த முகாம் ஒருங்கிணைக்கப்பட்டது.

இவ்விழிப்புணர்வு நிகழ்ச்சியில் கல்லூரியின் இளம் வேளாண் மாணவர்களான அத்வைத், ஐஸ்வர்யா, அஸ்வதி, தேவி, ஹரிநாராயணா, ஹிர்த்யா, ஜனுஸ்ரீ, லோச்சன், ரோசினி, சாய் லோகேஷ், சிவா மற்றும் சுபாஷினி ஆகியோர் பங்கேற்றுப் பகுதி விவசாயிகளுக்குப் பல்வேறு தொழில்நுட்ப விளக்கங்களை அளித்தனர்.

நிகழ்ச்சியில், தென்னை மரங்களைத் தாக்கும் பூச்சி மற்றும் நோய் பாதிப்புகளுக்கும், நுண் ஊட்டச்சத்துக் குறைபாடுகளால் ஏற்படும் அறிகுறிகளுக்கும் இடையே உள்ள முக்கிய வேறுபாடுகளை மாணவர்கள் சுட்டிக்காட்டினர். மேலும் ஊட்டச்சத்து குறைபாட்டைக் கண்டறியும் எளிய வழிகள்,

மரங்களின் இலை மற்றும் காய்களில் தோன்றும் அறிகுறிகள், மகசூல் இழப்பைத் தவிர்ப்பதற்கான சரியான உர மேலாண்மை மற்றும் ஒருங்கிணைந்த பயிர் பாதுகாப்பு முறைகள்

குறித்து விவசாயிகளுக்குத் தெளிவான விளக்கங்களை வழங்கிச் சந்தேகங்களைத் தீர்த்து வைத்தனர்.

தொடர்ந்து, குறுநல்லிபாளையம் பகுதி விவசாயிகளுடன் மாணவர்கள் நேரடியாகக் கலந்துரையாடினர். அப்போது, அப்பகுதியில் விவசாயிகள் சந்திக்கும் நடைமுறைச் சாகுபடிச் சவால்கள், தண்ணீர் தட்டுப்பாடு மற்றும் தென்னை சாகுபடியில் உள்ள பல்வேறு சிக்கல்களைக் கேட்டறிந்தனர்.

வேளாண் கல்வி நிறுவனங்களின் நவீனத் தொழில்நுட்ப அறிவை நேரடியாகக் கிராமப்புற விவசாயிகளுக்குக் கொண்டு சேர்க்கும் பாலமாக இந்நிகழ்ச்சி அமைந்ததாகவும், மாணவர்களின் இந்த முயற்சி சாகுபடி நுணுக்கங்களை அறிய மிகவும் பயனுள்ளதாக இருந்ததாகவும் அப்பகுதி விவசாயிகள் நெகிழ்ச்சியுடன் தெரிவித்தனர்.

Continue Reading

"ஸ்நாக்ஸ் வாங்கிக் கொண்டு கடையில் செல்போன் கைவரிசை : அதிர்ச்சி ஏற்படுத்தும் சி.சி.டி.வி காட்சிகள்!

வாடிக்கையாளர்கள் கூட்டத்தைப் பயன்படுத்தி மேசையில் இருந்த போனை அசைக்காமல் தூக்கிய மர்ம நபர்; சிசிடிவி காட்சிகளால் பரபரப்பு!

கோவை வைசியாள் வீதியில் (Vaisial Street) இயங்கி வரும் ஸ்நாக்ஸ் கடையில், வாடிக்கையாளர் போல வந்து ஸ்நாக்ஸ் வாங்குவது போல் நடித்து, ஊழியரின் கவனத்தைத் திருப்பி பொருட்களை கவரில் போட்டு பையில் போடும் போது செல்போனையும் தான் வைத்து இருந்த கட்டப்பையில் தள்ளிவிட்ட திருடிய சம்பவத்தின் சிசிடிவி காட்சிகள் வெளியாகி அப்பகுதி கடைக்காரர்கள் மத்தியில் அதிர்ச்சியை ஏற்படுத்தி உள்ளது. 

கோவை டவுன்ஹால் மற்றும் வைசியாள் வீதி சுற்றி உள்ள பகுதிகள் எப்போதுமே வணிக ரீதியாகப் பரபரப்பாகக் காணப்படும் இடங்களாகும். இந்நிலையில், வைசியாள் வீதியில் உள்ள ஸ்நாக்ஸ் கடை ஒன்றில் வழக்கம் போல் வியாபாரம் பரபரப்பாக நடைபெற்றுக் கொண்டு இருந்தது.

​அப்போது கடைக்கு வந்த மர்ம நபர் ஒருவன், ஸ்நாக்ஸ் ஆர்டர் செய்து அதனை பேக் செய்யும் போது ஊழியரிடம் பேச்சுக் கொடுத்து உள்ளான். 

கடையில் வாடிக்கையாளர்களின் கூட்டம் இருந்ததைச் சாதகமாகப் பயன்படுத்திக் கொண்ட அந்த நபர், மேசையின் மீது வைக்கப்பட்டு இருந்த ஊழியரின் செல்போனைத் தந்திரமாகத் மேஜையில் இருந்து கட்டப்பையில் தள்ளி விட்டு தூக்கிக் கொண்டு நைஸாகக் கடையை விட்டு நழுவி உள்ளான்.

சற்று நேரம் கழித்துத் தனது செல்போனைக் காணாமல் தேடிய கடை ஊழியர், சந்தேகம் அடைந்து கடையில் பொருத்தப்பட்டு இருந்த சிசிடிவி (CCTV) கேமரா காட்சிகளை ஆய்வு செய்தார்.  

​அப்போது, ஸ்நாக்ஸ் வாங்க வந்த நபர் மிகச் சாதுரியமாகக் கைவரிசை காட்டி செல்போனைத் திருடிச் செல்லும் காட்சிகள் தெளிவாகப் பதிவாகி இருந்தது கண்டு அதிர்ச்சி அடைந்தார். 

இந்தச் திருட்டுச் சம்பவத்தின் சி.சி.டி.வி வீடியோ காட்சிகள் தற்போது சமூக வலைதளங்களில் பரவி வருகிறது.

Continue Reading

கோவையில் ஓட்டுநர் உரிமம் இன்றி கனரக வாகனத்தை இயக்கிய இளைஞருக்கு ரூ.10,000 அபராதம்!

கோவை, வடவள்ளி–கணுவாய் சாலையில் ஓட்டுநர் உரிமம் இல்லாமல் கனரக வாகனத்தை இயக்கிய 20 வயது இளைஞருக்கு கோவை மாநகர காவல்துறையினர் ரூ.10,000 அபராதம் விதித்து நடவடிக்கை எடுத்துள்ளனர்.

கோவை வடவள்ளி–கணுவாய் சாலையில் சிறுவன் ஒருவன் கனரக வாகனத்தை இயக்கிச் செல்வது போன்ற வீடியோ சமூக வலைதளங்களில் வெளியாகி வைரலானது. இதனைப் பார்த்த பொதுமக்கள், ஓட்டுநர் உரிமம் பெறும் வயதைக்கூட எட்டாத சிறுவன் கனரக வாகனத்தை இயக்குவதாகக் கருதி கருத்துக்களை பகிர்ந்து வந்தனர்.

இதையடுத்து, வைரலான வீடியோ தொடர்பாக காவல்துறையினர் விசாரணை மேற்கொண்டனர். விசாரணையில், வீடியோவில் கனரக வாகனத்தை இயக்கியது சிறுவன் அல்ல, 20 வயதுடைய இளைஞர் என்பது தெரியவந்தது.

மேலும், அந்த இளைஞரிடம் கனரக வாகனத்தை இயக்குவதற்கான ஓட்டுநர் உரிமம் இல்லை என்பதும் விசாரணையில் தெரியவந்தது.

இதனைத் தொடர்ந்து, போக்குவரத்து விதிகளை மீறி ஓட்டுநர் உரிமம் இல்லாமல் கனரக வாகனத்தை இயக்கிய இளைஞருக்கு ரூ.10,000 அபராதம் விதித்து கோவை மாநகர காவல்துறையினர் நடவடிக்கை எடுத்து உள்ளனர்.

ஓட்டுநர் உரிமம் இன்றி கனரக வாகனங்களை இயக்குவது சாலைப் பாதுகாப்புக்கு ஆபத்தை ஏற்படுத்தக்கூடும் என்பதால், வாகன ஓட்டிகள் போக்குவரத்து விதிகளை முறையாகப் பின்பற்ற வேண்டும் என காவல்துறையினர் அறிவுறுத்தி உள்ளனர்.

Continue Reading

மக்களுக்காக... தரம், நம்பிக்கை - விளம்பரத்தில் பொய், பித்தலாட்டம்: மதுரையில் அரிசிக் கடைக்காரரின் அட்டகாசம்!

₹7,800 கொடுத்து ஏமாந்த கோவை குடும்பம்: தரமற்ற அரிசியைத் திருப்பிக் கொடுத்தும் பணத்தைத் தராமல் 1 வாரமாக இழுத்தடிப்பு!

​ "மக்களுக்காக என்றும், மக்களுக்காக...", "தரம், நம்பிக்கை, ஆரோக்கியம், நீண்ட ஆயுள்" எனப் பிரம்மாண்ட விளம்பரங்கள் செய்து மதுரையில் அரிசிக் கடை நடத்தி வரும் நபர் ஒருவர், தரமற்ற அரிசியைக் கொடுத்து ஏமாற்றியதோடு, அதற்கான பணத்தைத் திருப்பிக் கேட்க வந்த கோவை குடும்பத்தினரைக் கடந்த ஒரு வாரமாக அலைய விட்டு இழுத்தடித்து உள்ள சம்பவம் பெரும் அதிர்ச்சியை ஏற்படுத்தி உள்ளது.

கோவையைச் சேர்ந்த குடும்பத்தினர் சிலர், தங்களது மகளின் வளைகாப்பு நிகழ்ச்சிக்காக மதுரையில் உள்ள தங்களது பெற்றோர் வீட்டிற்குச் சென்று உள்ளனர். அப்போது, சமூக வலைதளங்களிலும் ஊடகங்களிலும் "தரம், நம்பிக்கை" எனப் பல்வேறு விளம்பரங்கள் மூலம் பிரபலமடைந்த மதுரையில் உள்ள அந்த அரிசிக் கடைக்குச் சென்று உள்ளனர்.

​அங்குச் சந்தை விலையை விட அதிகமாக, சுமார் ₹5,500 மட்டுமே பெற வேண்டிய அரிசிக்கு, ₹7,800 வரை பணத்தைக் கொடுத்து அரிசி மூட்டைகளை வாங்கி உள்ளனர்.

வளைகாப்பு நிகழ்ச்சியின் போது சமைப்பதற்காக அரிசி மூட்டையைத் திறந்து பார்த்த குடும்பத்தினருக்கு அதிர்ச்சி காத்து இருந்தது. விளம்பரத்தில் கூறியது போல் அல்லாமல், அரிசி மிகவும் தரமற்றதாகவும், சமைக்கப் பயன்படாத வகையிலும் இருந்து உள்ளது.

​இதை அடுத்து, வாங்கிய அரிசி மூட்டைகளை அப்படியே எடுத்துக் கொண்டு அந்தக் கடைக்குச் சென்று, "அரிசி தரமாக இல்லை, எங்கள் பணத்தைத் திருப்பிக் கொடுத்து விடுங்கள்" எனக் கேட்டு அரிசியை ஒப்படைத்து உள்ளனர்.

போலியான விளம்பரங்களை நம்பி ஏமாந்ததை உணர்ந்த குடும்பத்தினர் பணத்தைக் கேட்ட போது, ஆத்திரம் அடைந்த கடை உரிமையாளர் பணத்தைத் திருப்பிக் கொடுக்க மறுத்து உள்ளார். கடந்த ஒரு வார காலமாக, பணத்தைப் பெறுவதற்காக அந்தக் கோவை குடும்பத்தினர் தினமும் கடைக்கு வந்து பல மணி நேரம் காத்துக் கிடந்து ஏமாற்றத்துடன் திரும்பிச் செல்லும் அவல நிலை ஏற்பட்டு உள்ளது.

​"மக்களுக்காகவே வாழ்கிறோம், ஆரோக்கியத்தையும் தரத்தையும் மட்டுமே வழங்குகிறோம்" எனப் பெரிய வசனங்களைப் பேசி விளம்பரம் செய்து விட்டு, தரமற்ற அரிசியைக் கொடுத்தது மட்டுமன்றி, நியாயமாகக் கேட்க வந்த வாடிக்கையாளர்களை ஒரு வாரமாக அலைக்கழித்த அரிசிக் கடைக்காரரின் இந்தச் செயல் அப்பகுதி மக்கள் இடையேயும் வாடிக்கையாளர்கள் இடையேயும் பெரும் கொந்தளிப்பையும், அதிர்ச்சியையும் ஏற்படுத்தி உள்ளது.

Continue Reading